મને મારી બાની ભીડ નથી લાગતી

ખોબા જેવડી ઝૂંપડી
એમાં હવા માટે જગ્યા નથી
અહીં તડકા માટે જગ્યા નથી
એમાં નહાવા માટે જગ્યા નથી
અહીં ખુરશી માટે જગ્યા નથી
હું ઉંબરે બેસીને હોમવર્કમાં
આકાશ ઉપર નિબંધ લખું છું
અહીં મારૂં ઘર એટલું બધું સાંકડું છે
કે મને અક્ષરોની ભીડ લાગે છે
પણ સાંજ પડે મારી બા
કામેથી પાછી આવે ત્યારે
ખોબા જેવી ઝૂંપડી મોટી બની જાય છે
ઘર મોટું થઇ જાય છે
મને મારી બાની ભીડ નથી લાગતી !
( અંકિત ત્રિવેદી )