બા

મેં જોયેલોં ઈશ્વર – બા
સૌથી મોટો કિંમતી અક્ષર – બા
મેં જાણેલો પહેલો અને છેલ્લો પરમેશ્વર – બા
હોય તડકો તો એક હાથે તેડી લેતી’તી – બા
અને બીજા હાથે ઊંચકીને ઘર લઇ જતી’તી – બા
બાપુજીનું મૃત્યુ જોઇ પડી ભાંગી હતી – બા
બેઠું કરવાં ઘર થઇ ગઇ હતી પત્થર – બા
રસોડામાં પરસેવે રેબઝેબ મેં જોઇ નિરંતર – બા
રાંધવા પીરસવા બધાની ભૂખ ટાળવા મથતી’તી – બા
તારા વિના સાવ અધુરા સૌ અવસર – બા
હતી સ્વયં - છતાં સાવ જ ભુલાઇ ગયેલો અવસર – બા !
રાજેશ વ્યાસ ( મિસ્કીન )