suno suno aye duniya waalon Bapu ki ye amar kahaani

Part I
—————————————————-
suno suno aye duniya waalon Bapu ki ye amar kahaani
woh Bapu jo pujya hai itna jitna Ganga maa ka paani
suno suno aye duniya waalon Bapu ki ye amar kahani
Porbandar Gujarat desh mein ek rishi ne janam liya
maat pitah ne Mohandas Karamchand Gandhi naam diya
bachpan khelkood mein gujra London jaakar vidya payee
barristor ban Africa mein jaakar apni dhaak jamaayee
lekin jo phaani duniya mein amar kahaane aate hai
woh kab maaya moh mein phanskar apna samaa ganwaate hai
suno suno aye duniya waalon Bapu ki ye amar kahaani

Africa mein Hindi jan ki badi durdasha payee
gore raaj se takkar lekar satya ki jyot jalaayee
phir Bharat ki seva karne apne desh mein aaya
Sabarmati mein satyaagrah ka aashram aan banaaya
aur khilafat kranti prant mein sabhapati ka darjah paya
Islami adhikaar ki raksha mein bhi haath bataya
Hindu Muslim dono uski aankhon ke taare thhe
duniya ke saare hi mazhab Bapu ko pyaare the
suno suno aye duniya waalon Bapu ki ye amar kahani

Bharat kaumi Congress ki aisi dhoom machaayee
kaumi jhande ke neeche phir janta daudi aayee
khadi ka parchaar kiya phir ghar ghar khaadi aayee
aur bideshi maal ki holi Gandhi ne jalwaayee
charkhe ki awaaz jo goonjee huyee machine thandee
aur shaan se lahraayee Bharat ki trirangee jandee
suno suno aye duniya waalon Bapu ki ye amar kahani
woh bapu jo pujya hai itna jitna Ganga maa ka paani
suno suno aye duniya waalon Bapu ki ye amar kahani
———————————————————-
Part II
———————————————————–
suno suno aye duniya waalon Bapu ki ye amar kahaani
phir puran swaraaj ka naara jaala aur pukara
azaadi ka veer sipahee kabhi na himmat haara
phir daandi par jaakar apane haathon namak banaaya
saare desh ko satyagrah ka sundar sabak padhaya
Bharatwasi japate the phir Gandhi naam ki mala
chaalish karod dilon mein chhaya ek langoti wala
suno suno aye duniya waalon Bapu ki ye amar kahani

sachhai ka atal pujari jisne kabhi na himmat haari
sarkaari kanoon todkar duniya ke aaram chhod kar
desh ki khatir jail gaya aur apne sukh par khel gaya
suno suno aye duniya waalon bapu ki ye amar kahani

harijano ka maan badhaane ki khatir brat rakhha
Gandhi ne duniya ke aage ek naya mat rakhha
gaam gaam mein harijano ki haalat dekhi bhaali
harijan naam se harisevak ne ik akhbaar nikaali
congress ki baagdor phir veer Jawahar ko dekar
shuru kiya bapu ne apna gram sudhar ka chakkar
suno suno aye duniya waalon Bapu ki ye amar kahani

ek nayee awaaz jo aayee shuru huyi ik nayee ladayee
goonjha phir bapu ka naara chhodo Hindustan hamara
chhodo Hindustan hamara
phir aayi ik jail yatra jailon se kab darta tha woh
azaadi ka parwana thaa azaadi par marta tha woh
suno suno aye duniya waalon Bapu ki ye amar kahani
woh bapu jo pujya hai itna jitana Ganga maa ka paani
suno suno aye duniya waalon bapu ki ye amar kahani

————————————————————-
Part III
————————————————————–
suno suno aye duniya waalon bapu ki ye amar kahani
jail ke andar honi ne phir apana teer chalaaya
bapuji ki ardhangi ko ant bulawa aaya
jail ke andar khamoshi se deviji ki chita jalayee
janta apnni maa ke antim darshan bhi karne na payee
suno suno aye duniya waalon bapu ki ye amar kahaani

Hindu Muslim ke seenon mein phir bhadki nafarat ki jwaala
jisko dekh ke dukhi huaa Quran aur Geeta ka matwaala
Nawankhali mein khoon ki holi haiwano ne kheli
dayaa ki murat bapu se ye peeda gayee na jelee
tan pe langoti haath mein danda hothon pe thi prem ki baani
nagar nagar paidal phirta tha assee saal ka boodha praani
suno suno aye duniya waalon bapu ki ye amar kahani

sun saintaalish pandrah agast ko azaadi ka din jab aaya
apne desh mein apana zanda dhoom dhaam se lehraya
lekin us din pyara bapu bharat ka ujiyara bapu
door Dilli se Nawankhali mein kamjoron ki rakhwali mein
apni jaan ladaaye tha aur apana aap chupaye tha
suno suno aye duniya waalon bapu ki ye amar kahani

Kalkatte mein phir brat rakhha hindu muslim ko samjaane
bapu ka ye chamatkar tha samaj gaye dono deewane

Kalkatte e se Dilli aakar us nagri ka maan badhaya
saanj sawere ramnaam ka birla ghar mein diya jalaya
Raghupati Raghav rajaram Ishwar Allah tere naam
bapu ka aadhar yahin tha bapu ka parchaar yahin tha
suno suno aye duniya waalon Bapu ki ye amar kahani
woh bapu jo pujya hai itana jitana ganga maa ka paani
suno suno aye duniya waalon Bapu ki ye amar kahani

—————————————————————
Part IV
—————————————————————
suno suno aye duniya waalon bapu ki ye amar kahani
woh bapu jo pujya hai itna jitana ganga maa ka paani
suno suno aye duniya waalon bapu ki ye amar kahani

tees janwari shaam ko bapu Birla ghar se baahar aaye
praarthna asthaan ki jaanib dheere dheere kadam badhaaye
lekin us din honi apna roop badalkar aayee
aur ahinsa ke seene par hinsa ne goli barsaayee
bapu ne kaha Raam Raam aur jag se kiya kinaara
Raam ke mandir mein jaa pahuncha Shri Raam ka pyaara

jao bapu jao bapu rahega naam tumhaara
jab tak chamke chaand sitaare chamke kaam tumhaara
Bapu tumne praan diye aur maut ki shaan badhaayee
tumne apna khoon diya aur prem ki jyot jalaayee

jai Bapu ki jai Gandhi ki bolo sab jan jai Gandhi
jis ne hindi muslim mein ik dor pyar ki bandhi
yaad rahe bapu ki kahani bhool naa is ko jaayen hum
bapu ne jo diya jalaaya uski jyot badhaaye hum
jai Bapu ki jai Gandhi ki bolo sab jan jai Gandhi
jai Bapu ki jai Gandhi ki bolo sab jan jai Gandhi
jai Gandhi jai Gandhi jai Gandhi jai Gandhi jai Gandhi