Chhodo Kal Ki Baatein - Kal Ki Baat Poorani

chhodo kal ki baaten, kal ki baat puraani
nae daur men likhenge, mil kar nai kahaani
ham hindustaani, ham hindustaani

aaj puraani zanjiron ko tod chuke hain
kya dekhen us manzil ko jo chhod chuke hain
chaand ke dar par ja pahuncha hai aaj zamaana
nae jagat se ham bhi naata jod chuke hain
naya khoon hai, nai umangen, ab hai nai javaani
ham hindustaani, ham hindustaani......

ham ko kitane taajamahal hain aur banaane
kitane hain ajanta ham ko aur sajaane
abhi palatna hai rukh kitane dariyaaon ka
kitane parbat raahon se hain aaj hataane
naya khoon hai, nai umangen, ab hai nai javaani
ham hindustaani, ham hindustaani......

aao mehanat ko apana imaan banaaen
apane haathon se apana bhagavaan banaaen
raam ki is dharati ko, gautam ki bhumi ko
sapanon se bhi pyaara hindustaan banaaen
naya khoon hai, nai umangen, ab hai nai javaani
ham hindustaani, ham hindustaani......

har zarra hai moti, aankh uthaakar dekho
mitti men sona hai, haath badhaakar dekho
sone ki ye ganga hai chaandi ki yamuna
chaaho to patthar pe dhaan ugaakar dekho
naya khoon hai, nai umangen, ab hai nai javaani
ham hindustaani, ham hindustaani......